Энэ сарын 12-ны өдөр Олон улсын жүдо бөхийн холбооноос жүдочдын чансааг шинэчлэн гаргасан байна. Шинэчлэгдсэн чансаагаар манай долоон бөх дэлхийн чансааны эхний 10-т багтжээ. Тухайлбал, Хөдөлмөрийн баатар, гавьяат тамирчин Д.Сумъяа 57 кг-ын жинд дэлхийн чансааг тэргүүлсэн хэвээр буй бол МУГТ М.Уранцэцэг 48 кг-ын жинд нэг байраар ухарч, хоёрдугаарт бичигдсэн байна.
Тэрбээр Японы бөх Фүна Тонакигад дэлхийн чансааны тэргүүн байраа алджээ. Мөн манай жүдочдоос эмэгтэйчүүдийн 63 кг-ын жинд Б.Мөнгөнчимэг дэлхийн чансааны долдугаар байрт, эрэгтэйчүүдийн 60 кг-ын жинд Д.Амартүвшин дөрөвдүгээрт, 66 кг-ын жинд Г.Хэрлэн тавдугаарт, 73 кг-ын жинд Г.Одбаяр гуравдугаарт, 81 кг-ын жинд О.Ууганбаатар тавдугаар байрт тус тус бичигдэж байгаа аж.
Ц.Аюу
