Шинэ мэдээ
Их уншсан
Уншиж байна ..
Өдрийн төрх

Алтансүхийн алтан медаль авах мөрөөдөл биелнэ

4 өдөр
НИЙСЛЭЛ.mn

Энэ залууг Ц.Алтансүх гэдэг. Ховд аймагт төрж өссөн, айл гэрийн эзэн, хоёр хүүхдийн аав эгэл жирийн л залуу. Хүмүүсийн ярьж заншсанаар сонсгол, ярианы бэрхшээлтэй. Гэхдээ түүний төрөлхийн энэ бэрхшээл түүний амьдрал, хүсэл мөрөөдөлд өчүүхэн төдий ч бэрхшээл болоогүйг мэднэ. Бүх зүйл нь бүрэн бүтэн зарим залуу халамжид дугаарлаж, миний муу амьдарч байгаа нь төрийн буруу хэмээн бэлэнчилж суухад манай Ц.Алтансүх ард түмий унаа гэгддэг Приус 20 машинаар Улаанбаатарт үүрийн таван жингээс үдшийн бүрий болтол халтуур (такси үйлчилгээ)-нд явж амьжиргаагаа залгуулна. Өөрийн шударга хөдөлмөрөөр олсон мөнгөөрөө ээж, эхнэр, гэр бүлээ аваад явчихна. Анх нэлээн хуучин, шатахуун их зарцуулдаг машинтай байснаа мөнгө хуримтлуулсаар байгаад саяхан Приус 20 машин аваад уначихсан, их л догь явна лээ. Өөрөө дохионы хэлээр маш сайн ярина. Үйлчлүүлдэг бараг бүх хүн дохионы хэл мэддэггүй учраас тэмдэглэлийн дэвтэр дээр хаашаа очихыг хүсэж байгааг нь бичүүлээд авчихна. Хөлсний машинд суудаг нийслэлийнхэн түүнийг бараг андахгүй дээ. Ууж согтуурхсан ганц нэг хүн нүдээ том болгон харж төвөгшөөдгийг эс тооцвол үйлчлүүлэгчид түүнд хүндэтгэлтэй хандаж, сэтгэл хангалуун байдаг юм билээ. Бид хоёр бага ангидаа хамт сурч байв. Хичээл сурлагын хувьд сайн ойлгуулж зааж чадвал Ц.Алтансүх “ОНЦ”-оос өөр дүн бараг авдаггүй сурагч байлаа. Хүүхэд тавдугаар ангид байхад надад дохионы үсэг зааж өгсөн учраас бидний харилцаанд ямар ч бэрхшээл гардаггүй. Хичээлийн хажуугаар спорт хөөнө, тэр дундаа шатар тоглох дуртай байсныг нь тод санадаг юм. Энд тэнд шатрын тэмцээн болох зарыг андахгүй. Гүйж очоод бүртгүүлчихнэ, тоглоно, хожно, бас хожигдоно. Хөгжлийн бэрхшээлтэй иргэдийн өдрөөр болдог спорт тэмцээний шатрын төрөлд аваргалаад амжсан байгаа юм. Саяхан Ц.Алтансүх найзад маань баярт мэдээ иржээ. Тэрбээр 2018 оны 7-р сарын 6-16-нд Английн Манчестер хотноо болох сонсголын бэрхшээлтэй иргэдийн шатрын 18-р олимпод оролцох Монголын багийн бүрэлдэхүүнд багтжээ. Өмнө нь Ази тивийн сонсголын бэрхшээлтэй иргэдийн аварга шалгаруулах тэмцээнд оролцож байсан туршлагатай, амжилт гаргах магадлалтай учраас түүнийг багтаа оруулсан нь эргэлзээгүй. Би ч найзыгаа оюуны спортоор олимпийн аварга болоод эх орныхоо нэрийг даян дэлхийд дуурсгаад ирнэ гэдэгт эргэлзэхгүй байгаа. Найзад маань урам зориг нэмэх бидний тусламж хэрэг боллоо. Гадаад улсад болж байгаа тэмцээнд оролцоход мэдээж зардал гарна. Түүний явах, ирэх галт тэрэг, онгоцны зардал нийлээд 4 сая төгрөг болох тооцоо гарчээ. Ирэх сар гэхэд энэ зардлаа олж, захиалгаа урьдчилан өгөх учиртай. Өөрөө тун их хичээж, шөнө унталгүй шахам жолоо мушгиж байгаа ч тэмцээний зардалд илүүчлэх хэмжээний орлого бүрдэх билээ. Шатрын спортод чин сэтгэлээ зориулдаг, амьдралд бууж өгөлгүй тэмцдэг, хөдөлмөрлөдөг түүнд зардлаа босгоход нь туслахыг Та бүхнээс хичээнгүйлэн хүсье. Ц.Алтансүхийн олимпоос алтан медаль авах хүсэл мөрөөдлийг нь хамтдаа биелүүлцгээе.

Хандивын данс: Хаан банк 5077024062 Ц.Алтансүх
Холбогдох утас: 80455550, 99106143

Сайн үйлс дэлгэрэх болтугай 
Найз Б.Түвшинтөгс

СЭТГЭГДЭЛ
АНХААРУУЛГА: Уншигчдын бичсэн сэтгэгдэлд НИЙСЛЭЛ.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг хэллэгийг хязгаарласан тул бусдын эрх ашгийг хүндэтгэн үзнэ үү.
0/500 тэмдэгт
НИЙТ СЭТГЭГДЭЛ (1)
Dashka-29Зочин [103.26.195.162] 4 өдөр
Монголчууд оюунлаг ард түмэн шүү дээ Иймд энэхүү залууд бүгдээрээ сэтгэлээрээ туслан дэмжээрэй