Хүүхэд бүр дэлгүүр орох дуртай байдаг. Энэ нь мэдээж өөрийн дуртай зүйлсээ худалдан авах хүсэлтэй нь холбоотой. Ихэнх хүүхэд дэлгүүрийн лангуун дээрх тоглоом, эсвэл чихэр жимсийг авахыг хүссэн бол үүнийгээ шууд илэрхийлдэг. Дараа авч өгье, мөнгө байхгүй гэх эцэг, эхийн тайлбарыг тэр бүр тоодоггүй. Үүнд эцэг, эхчүүд янз бүр ханддаг. Хүүхэддээ хүссэн бүхнийг нь авч өгөөд хэвшчихсэн нэгэн байхад болохгүй гэдгийг нь ойлгуулахын тулд загнаж зандрах хүмүүс бий. Тэгвэл хүүхдэд мөнгөний үнэ цэнийг ойлгуулах нь чухал юм. Хамгийн гол нь зан, сэтгэхүйд нь тохируулж таниулах шаардлагатай билээ. Хүүхдийн төлөвшлийн 70 хувь нь 0-3 насанд тогтдог байна. Тиймээс гурван настайгаас нь эхлэн мөнгөө удирдах арга ухаанд бага багаар нь сургах шаардлагатай аж.
Хүүхдээ багаас нь мөнгөтэй харьцаж сургах эхний алхам бол мөнгөө хадгалж сургах явдал юм. Хүүхдийн хүсэл мөрөөдөл тоймгүй. Дэлгүүрт харсан машин, хүүхэлдэй зэргийг шууд авч өгөх боломжгүй гэж хэлэхийн оронд ээжтэйгээ хамт мөнгөө бага багаар цуглуулж байгаад их болохоор нь авъя хэмээн ойлгуулж болно. Мөнгө хадгалах гахай зэргээр сонирхолыг нь татах зүйлст мөнгийг нь цуглуулж, урмын үг хэлж байх нь зүйтэй. Мөн мөнгөө өгөхдөө хэрхэн ажиллаж олсон тухай товчхон, хөгжилтэй байдлаар тайлбарлаж байх нь хүүхдэд ажил хөдөлмөр хийснээр цалин авдаг гэсэн ойлголтыг суулгаж өгнө. Үүнээс гадна зарим тохиолдолд чихэр, жимснээс татгалзаж, хэмнэсэн мөнгөө гахайндаа хийж цуглуулаад хурдан машинаа авъя гэх зэргээр хадгалалтын үнэ цэнийн тухай ойлголтыг бага багаар таниулах бололцоотой.
Хүүхэд мөнгөний ялгааг танин мэдэх шаардлагатай. Зарим хүүхэд мөнгөн дэвсгэртийн их, багийг ялгаж чаддаг ч энэ ялгаа нь яагаад чухал гэдгийг ойлгодоггүй. Тиймээс хүүхдээ дагуулж дэлгүүрээс худалдан авалт хийхдээ ямар мөнгөөр юу худалдаж авч болох тухай тайлбарлаж байх нь зүйтэй.
Халаасны мөнгөний гол зорилго нь хүүхдүүдэд мөнгийг хэрхэн, яаж ухаалгаар зарцуулахад сургах явдал байдаг. Юуны түрүүнд хэрэгцээг хангасан халаасны мөнгөний хэмжээг тодорхойлох нь зүйтэй. Хүүхдүүдийнхээ зайлшгүй болон зайлшгүй бус зарлагыг тооцоолох хэрэгтэй. Yүний дараагаар, хүүхдийнхээ нас болон төлөвшсөн байдал зэргийг харгалзан үзээд аль зардлыг нь өөрсдөөр нь хариуцуулахаа шийдэх хэрэгтэй. Улмаар үүнд нь зориулж төсөв гаргана. Энэ нь тэдний халаасны мөнгө юм. Эхэндээ тэдний зайлшгүй хэрэгцээний мөнгийг бага багаар өгнө. Яваандаа тэд өөртөө итгэлтэй болох тусам өгөх мөнгөний хэмжээг ихэсгэж болно. Мэдээж тэд эхний үед алдаа гаргана гэдэгт бэлтгэлтэй байгаарай. Учир нь энэ бол мөнгөтэй харьцах хичээлийн нэг чухал хэсэг юм. Хэрэв таны хүү долоо хоногийн төсвөө дөнгөж мягмар гарагт үрчихээд, маргааш өдөр нь өөр нэг тоглоом авах мөнгө гуйвал “үгүй” гэж хэлэх хэрэгтэй. Ингэж хэлснээр та хүүхдүүддээ мөнгөө төсөвлөхийн ач холбогдлыг ухааруулж өгнө. Заримдаа, иймэрхүү нөхцөл байдлыг ашиглан өөрт үнэхээр хэрэгтэй зүйл авахын тулд мөнгөө хэмнэж, тийм ч чухал бус зүйлд тоохгүй өнгөрөхийн ач холбогдлыг тайлбарлаж өгөх хэрэгтэй. Халаасны мөнгөөр амьдралын чухал хичээл зааж өгөх нь зүйтэй. Хүүхдүүддээ хэрэгцээт зардал дээр нь нэмж бага зэрэг мөнгийг буяны үйлсэд зарцуулах боломжтойгоор өгөх хэрэгтэй. Жишээ нь, миний хүү өөрийн халаасны мөнгөний тодорхой хувийг буяны үйлсэд зарцуулах ёстойг мэддэг. Мөн бага зэрэг мөнгийг хадгалуулах зориулалтаар өгөх нь ач холбогдолтой байдаг. Эцэст нь хэлэхэд, хэдий чинээ хурдан таны хүүхдүүд өөрсдийн мөнгийг захирч сурна, төдий чинээ түргэн та өөрийн мөнгөн дээр төвлөрөх боломжтой болж байгааг бүү мартаарай.
Хүүхэд бүрийн мэдэх ёстой мөнгөний тухай ойлголт
1. Хүссэн бүхнээ хийдэг баян хүн болох эсэх нь чиний сонголт. Тиймээс одооноос баян болох аргуудыг сураарай.
2. Одооноос эхэлж мөнгөтэй зөв харьцаж, зөв зуршилтай болох аргуудыг сураарай.
3. Мөнгөтэй болсон үедээ бүгдийг нь үрэх бус талыг нь хадгалж сур.
4. Сар бүр, долоо хоног бүр хэдэн төгрөгөөр юу худалдаж авах, хэдэн төгрөг хадгалах гээд бүгдийг төлөвлө.
5. Хадгаламжтай байснаар чиний дансанд үргэлж мөнгө нэмэгддэг бол, өртэй байвал чиний халааснаас үргэлж мөнгө гарч байдаг юм шүү.
6. Өөрт байгаа бүх мөнгөө хэрэглээндээ зарцуулах, ойрын хугацаанд хадгалах, урт хугацаанд хадгалах гэж гурав ангилж хэрэглэж сураарай.
7. Хадгалж, хуримтлуулж чадсан хүн л баяжиж, санхүүгийн эрх чөлөөтэй болдог. Банкинд хадгаламжтай болж хүүгээр нь мөнгөө өсгөөрэй.
8. Хэчнээн их мөнгө олж байсан ч бүгдийг нь хэрэгцээгүй зүйлд үрээд байх нь буруу. Мөнгөтэй ухаалаг харьцаж сурснаар чи мөнгөө хадгалах, өсгөх боломжтой юм.
9. Мөнгө бол чиний эцсийн зорилго биш. Харин үүнийг ашиглан санхүүгийн эрх чөлөөтэй болж хүсэл мөрөөдлөө биелүүлэх нь чиний зорилго юм шүү.
10. Мөнгөө банкинд хүүтэй хадгалуулах, эсвэл ах, эгчдээ хүүтэй зээлүүлэх зэргээр мөнгөө үргэлж өсгөж, эргэлтэд оруулж бай. Ингэвэл чи үрж, зарцуулж байгаагаасаа илүү олж байх болно.