Улаанбаатар хотын харьяат М, Орхон аймгийн харьяат Н нар өнгөрсөн сарын 28-ны өдөр Улаанбаатар-Эрээн чиглэлд аялж явсан галт тэргэнд ангийн эд эрхтэн нуун өмнөд хөрш рүү гаргах гэж байжээ.
Тодруулбал, бугын чив дөрөв, чонын гурван толгой, эрүү, ходоод 12, хүдрийн заар тав, бугын эвэр 20 кг-ыг биедээ нуун хил давуулах гэж байсныг илрүүлсэн байна.
Тэднийг Дорноговь аймгийн Замын-Үүд сум дахь Сум дундын Цагдаагийн хэлтсийн алба хаагчид, ЭЦГ-ын Эдийн засгийн гэмт хэрэгтэй тэмцэх хэлтсийн ажилтнууд хамтран илрүүлэн, шалгаж эхэлжээ.
Дашрамд дурдахад, нэн ховор амьтанд тооцогддог нэг хүдрийн экологи-эдийн засгийн үнэлгээ нь 3-3.5 сая төгрөг, нэг буга 6.6-7.5 сая төгрөг байдаг аж.