"Эн Эйч Кэй" мэдээллийн суваг дайн, зөрчил мөргөлдөөнтэй газруудад хүүхдийн эрх хэрхэн зөрчигдөж байгаа талаар сэтгэл эмзэглүүлэм тайлан мэдээг нийтэлсэн байна. Энэ тайланг НҮБ-ын олон улсын хүүхдийн сан буюу ЮНИСЕФ-ээс гаргажээ. Тайланд дурдсанаар өнгөрөгч 2016 он бол Сирийн хүүхдүүдийн хувьд үнэхээр гамшгийн он байлаа. Учир нь энэ ганцхан жилийн хугацаанд Сири улсад 650 хүүхэд дайны хөлд үрэгдэн нас барсан байна.
Энэ тоо бол 2015 оныхоос даруй 20 хувиар өссөн үзүүлэлт юм. Энэ нь албан ёсоор бүртгэгдсэн тоо төдийгүй үүний цаана нас барсан ч бүртгэгдээгүй олон зуун хүүхэд байгаа гэж ЮНИСЕФ-ээс мэдэгдсэн байна.
Ер нь дайны, зөрчил мөргөлдөөнтэй бүс нутгуудаас гадна амиа золиослогч этгээдүүдийн дайралт халдлагын улмаас амиа алдаж байгаа хүүхдүүдийн тоо өссөөр байгаа нь өнөөдөр дэлхий ертөнц дээр үүссэн эмх замбараагүй байдал, талцал хуваагдлаас үүдэлтэй гэлээ. Үүний хохирогч нь гэм зэмгүй хүүхдүүд болж байгаа нь харамсалтай юм.
