Төрийн ордонд Үндсэн хуульд өөрчлөлт оруулах асуудлаар улс төрийн намуудын зөвилцөх уулзалт боллоо. Ажил хэрэгч гэхээсээ илүүтэй биеэ биеэ дайрсан, доош хийсэн, эрт урьдын өс хонзон цухалзсан яриа илүү өрнөв. Монголын улс төрийн намуудын дарга нар, удирдах төвшний хүмүүс Үндсэн хуульд өөрчлөлт оруулах тухай гэх том малгай, сэдвийн дор цугласан хэрнээ цэцэрлэгийн багачуудаас ч дор авир гаргах нь нэн өрөвдөлтэй. Харин энэ унтаа хурлын үеэр МУНН-ын дарга Б.Батболд улс төрийн намуудын дарга нарын сонорт нэгэн ноцтой мэдээлэл дуулгав. Тэрбээр, одоогийн эрх баригчид Эрүүгийн хуульд байсан “Эх орноосоо урвах” гэсэн зүйлчлэлийг яагаад хасчихсан юм бэ. МАН төсвөөс мөнгө татаж, гишүүдээсээ хандив нэхэж босгосон Тусгаар тогтнолын гэх нэртэй том ордонтой биш бил үү. Тусгай хууль батлуулж байгаад жил бүрийн 3-р сард Эх орончдын өдөр гэх нэрийдлээр намынхаа баярыг тэмдэглэдэг биш бил үү. Тэгсэн хэрнээ эх орноосоо урвагчдад хуулийн хатуу цээрлэл үзүүлэх заалтыг байхгүй болгочихоод ингээд сууж байж таарахгүй. МАН-ын дарга М.Энхболд оо, хэрэв эх орон, тусгаар тогтнолынхоо эсрэг явдаг хүмүүсийг өршөөх бодлого барьж байгаа бол бид ард түмний бослого гаргана шүү. Байж болохгүй энэ алдаагаа хурдан залруулахыг шаардаж байна. Улс төрийн намууд энэ асуудалд соргог хандахыг уриалъя гэв. УИХ-ын гишүүн Д.Лүндээжанцан “Өмнөх болон одоогийн УИХ-ын баталсан хуульд зөрүүтэй асуудал байж мэднэ. Ажлын хэсэг гаргаад нарийн судлуулж, дүгнэлт гаргуулах чиглэлд ажиллая. Хэрэв алдаа эндэгдэл гарсан бол хуулийн төсөл санаачлах эрх нээлттэй” хэмээн тайлбар хэллээ.