Дорноговь аймгийн Замын-Үүд суманд 8 настай охин алга болоод арав гаруй хоног өнгөрч байна. Охиныг эрэн хайх ажиллагаанд эхлээд сайн дурынхныг оролцуулсан ч хэд хоногийн дараа сумын төвийг бүрэн нэгжиж дууссан тул одоо зөвхөн хуулийн байгууллагынхан ажиллагааг үргэлжлүүлж байна. Сайн дурынхны оролцоог хязгаарласан нь цаанаа бас өөр учир шалтгаантай байсан нь тодорхой боллоо.
Тус суманд байдаг барилга байгууламжийг нэг бүрчлэн нэгжиж охиныг хайсан байна. Ингэх үед бусдын өмч хөрөнгө рүү прокурорын зөвшөөрөлгүйгээр халдах, нэвтрэх явдал хэд хэд гарчээ. Сайн дураараа эрлийн ажилд оролцож байсан зарим хүн хуулиа мэдэхгүйгээс болоод ийм зөрчил гаргасан байж ч мэдэх тухай эх сурвалжууд өгүүллээ.
Хамгийн ноцтой нь Замын-Үүдэд ложистикийн төвийн барилга барьж байсан хятадуудын эрх зөрчигдсөн тухай эх сурвалжууд мэдээлэв. Охиныг эрэн хайх ажлын хүрээнд 100 гаруй хятад ажилчны сууринд хэд хэдэн удаагийн үзлэг хийжээ. Гэтэл хэсэг залуус сайн дураараа нэгдэж ямар нэгэн зөвшөөрөлгүйгээр хятад ажилчдын хуаранд урилгагүй зочилжээ. Энэ үеэр гар утас гэх мэт эд зүйлс алга болсон тухай гомдол хуулийн байгууллагад ирсэн байна. Энэ үйл явдлаас болоод Замын-Үүд дэх БНХАУ-ын Консулынхан иргэдийнхээ эрх зөрчигдсөн асуудлаар орон нутгийн удирдлагуудаас асууж сураглах болжээ. Юутай ч энэ хэрэг явдлыг цагдаагийн байгууллага анхааралдаа авч тодруулан шалгаж байгаа юм байна.
Б.Төгс
