Монгол Улсын "Роснефть" компаниас худалдаж авдаг шатахууны үнэ хоёрдугаар сард дахин өсчээ. Хоёрдугаар сарын эхээр"Роснефть" компанийн төлөөлөл Монгол Улсад ирж ажилласан. Энэ үеэр АМГТГ болон импортлогч компаниудтай бүтээгдэхүүн нийлүүлэх гэрээ, тухайн жилийн үнэ ханшийн талаар ярилцсан юм. Энэ сарын 26-28-нд Москва хотод болох ОХУ, Монголын Засгийн газар хоорондын хуралдаанаар илүү тодорхой болно гэж УУХҮ-ийн Сайд Д.Сумъяабазар хэлж байсан юм. Газрын тосны ханш өссөнтэй холбоотойгоор компаниуд эхний удаад бүтээгдэхүүний үнийг 20-30 төгрөгөөр нэмэхээ УУХҮЯ-нд мэдэгдээд байгаа аж. Албаны эх сурвалжийн хэлснээр гуравдугаар сард шатахууны үнэ эргээд буурах боломжтой гэсэн юм.
