Нийслэлийн Баянзүрх дүүргийн 133 дугаар сургуулийн сурагчдын эцэг эхийн төлөөлөл өнөөдөр Сүхбаатарын талбайд жагслаа. Тэд тус сургуулийн даац хэтэрч, хүүхдүүд 3-4 ээлжээр хичээллэж байгааг эсэргүүцсэн юм.
Жагсаалд оролцсон эцэг, эхчүүд Монгол Улсын Ерөнхийлөгч, БСШУС-ын сайд, УИХ-ын дарга, НИТХ-ийн дарга нарт дэмжлэг хүсэх тухай шаардлага бичиг хүргүүлсэн. 133 дугаар сургууль 2017 оноос хойш “Монгол тэмүүлэл” сургуультай нэг байранд цуг хичээллэж байгаа юм.
Жагсаалын үеэр тэд “133-р сургуульд сурч буй хүүхдүүд эрүүл аюулгүй орчинд сурах эрхээ эдэлж чадахгүй байна. Хүүхдүүд гэлтгүй багш ажилчид ч ая тухтай нөхцөлд ажиллаж чадахгүй байна. Иймээс эцэг эхчүүд бид өнгөрсөн хавраас эхлэн “Монгол тэмүүлэл” сургуулийг нүүлгэж, 133-р сургуулийг тус байранд нь бүтнээр эзэмшүүлэн үйл ажиллагаа явуулахыг хүсэж буй.
Үүний хүчинд БСШУС-ын сайд Баатарбилэг 2019 оны наймдугаар сарын 30-нд “Монгол тэмүүлэл” сургуулийг нүүлгэх байрыг бэлтгэх хоёр ажлын хэсэг гаргасан. Гэвч уг тушаал гарснаас хойш 45 хоночихоод байхад ямар ч шийд гаралгүй, 133-р сургуулийн хүүхдүүд дөрвөн ээлжээр хичээллэж байна. Иймээс төр засгийн удирдлагуудад шаардлага хүргүүлж байгаа юм. Энэ оны арваннэгдүгээр сарын 1-нээс өмнө “Монгол тэмүүлэл” сургуулийг нүүлгэж, 133-р сургуулийг хоёр ээлжид оруулахгүй бол хүүхдүүдээ сургуульд нь явуулахгүй, тэмцлийн хурц хэлбэрт шилжинэ” гэлээ.
